sábado, 30 de abril de 2011

Timor Oan Nebe Tama Uluk Sidade Peterborough

Foto hafoin halo via sakra hamutuk iha Igreja St. Peter and All Souls nia oin


Komemora loron internasional trabalhador nian, 1 de Maio de 2011, hau halo investigasaun ida hodi buka hatene Timor se-se mak to’o uluk iha sidadi Peterborough hodi buka servisu i oinsa Timor oan nia moris iha Peterborough.


Investigasun ne'e laos definitivu. Ne'e duni, hau husu informasaun seluk tan hosi sani nain sira (liu-liu Timor oan sira iha Peterborough) hodi halo los investigasaun ne'e. Hau nia objektivu maka: buka halo historia konaba moris Timor oan nian iha sidadi Peterborough.


Hosi Politiku ba buka moris seluk

Duranti okupasaun Indonesia iha Timor Leste, 1975 – 1999, povo Timor moris iha susar to'o mate, mate ema barak. Hafoin tiha massakre Santa Cruz 12 de Novembro de 1991, Klosan Timor oan barak maka halai sai hosi Timor Leste. Barak uza dalan "azilu politiku" ba embaixadas estranjeiras iha Jakarta, capital Indonesia, hodi sai hosi Timor Leste, rumo ba Portugal.


Hafoin tiha Timor Leste hetan liberdadi iha 30 de Agostu de 1999, Timor oan nebe to’o iha Portugal liu hosi dalan azilu politiku, komesa buka dalan seluk hodi hadia sira nia moris. Barak mak buka servisu no moris iha Inglaterra no Irlanda.


Klosan sira ne'e hateten nune: “objektivu politiku hetan ona (le: Timor Ukun-an ona), agora ida-idak tenki hadia ida-idak nia moris”.


Iha tinan 2000, Timor oan komesa tama iha sidadi Peterborough. Sira nia objektivu mak buka servisu.


Sira nain hat nebe tama uluk Peterborough iha 2000 maka: Zeca Cruz, Emiliano, Afiku i Ameu Correia. Depois, iha 2001, to’o tan Timor oan nain 2 maka: Abau ho Laura. Laura mak feto Timor primeira tama iha sidadi Peterborough. Sira hela hamutuk iha ajensia nia uma alugada, iha Alexandre rd.

A partir ne'e, Timor oan komesa bolu malun hodi tama sidadi Peterborough.


Moris nudar trabalhador iha sidadi Peterborough

Atualmente Timor oan barak mak hela iha sidadi Peterborough. Mais ou menus 300 pessoas, komesa hosi familia, klosan no labarik. Maioria, 70% servisu iha fabrika Morrison, Thrapston. Balun servisu direktu, balun servisu tuir ajensia.
Sira aluga uma pakistanes nian iha area Gladstone st., Russel st., Cromwell rd., Lincoln rd, Dogsthorpe i Eastfield.
Familia no klosan sira okupa sira ninia tempu iha fabrika, labarik kiik sira okupa sira ninia tempu iha eskola.


Saudades hahan Timor nian

Atu oho saudades ba "hahan" Timor nian, sira ba sosa sasan iha china, india, afrika nia loja hanesan: batar, koto, fehuk, supermi, kanko, ai-dila, mostarda no seluk-seluk tan. Hosi lojas sira ne'e, sira bele halo hahan Timor no Indonezia nian hanesan: katupa, kue bandeira, pao kukus, sasate, bakso, tukir, chao-mi, batar-dan, karil manu, modo masin, modo metan, fehuk-dan, ai-farina no seluk-seluk tan.


Hatene Lian Ingles, Dalan ba Hetan Servisu

Atu hetan servisu ho fasil no halo adaptasaun no integrasaun halo didiak iha sidadi Peterborough, ema tenki hatene koalia Ingles. Timor oan barak maka hetan difikuldadi atu buka servisu no trata surat oi-oin tamba la hatene koalia lian Ingles. Sira susar atu halo adaptasaun ou integrasaun ho ambiente nebe sira moris ba.


Ne'e duni, Timor oan hotu-hotu tenki buka hatene koalia lian Ingles atu nune labele hetan difikuldades iha ema nia rain.


Lakon Osan Iha Jogo

Timor oan barak maka gasta sira nia tempu no hanoin iha jogo oi-oin nebe legal, halo sira lakon osan barak. Osan nebe sira simu, gasta hotu ba joga. Semana-semana ou fulan-fulan osan nebe sira simu hosi sira ninia servisu fatin (le: salariu), kuaze lakon hotu iha jogo nia laran. Fulan ida ema ida bele lakon hosi £100 to'o £1000.


Barak mak fila ona ba Timor tamba suksesus, barak maka fila tamba la toman ho ambienti moris. Balun planu atu fila tamba situasaun iha Timor Leste komesa diak daudaun. Maibe, Timor oan barak maka kontinua to’o iha sidadi Peterborough hodi buka servisu.


Celso Oliveira

terça-feira, 26 de abril de 2011

Timor Oan Iha Peterborough Halo Barbekiu Selebra Paskoa 2011









Timor oan iha Peterborough selebra paskoa tinan 2011 hodi halo barbekiu. Tunu sasate, nan manu, nan fahi, ikan, salsisha. Hemu coca cola, fanta, wkd, cerveja no whisky hodi kanta, rona muzika tetum, indonesia, portugues i ingles, hahu'u dader to'o kalan.


Klosan, katuas, ferik no labarik sira halibur hamutuk tinan ida dala ida iha uma kain ida-idak hodi selebra paskoa nebe monu iha loron manas furak iha domingo, 24 de Abril.


Hanesan Timor oan lao rai, loron paskoa hanesan loron atu halibur hamutuk i halo refleksaun konaba loron aban bain rua nian.


Sidadi Peterborough desde 2001 halibur trabalhador Timor oan barak.

Bispo Carlos Belo iha mensajem paskal ba Timor oan iha Irlanda no Inglaterra hateten nune: "Foin sa’e Timor nian, mane no feto, hakur tasi ba rai seluk atu buka serbisu no matenek. Ida ne’e mos kruz ida nebé imi tem ke lori. Nain Jezus nebé moris ona, tulun imi, fó kbiit ba imi, haraik dame ba imi, atu imi tomak hetan isi diak, no felicidade ba imi nia Família. Ita reza ba malu nafatin atu ita tomak bele sai ema foun, ema nebé moris fali ona ba moris foun, esperansa foun, entuziasmo foun"!



Celso Oliveira

sábado, 23 de abril de 2011

Bispo Belo Haruka Mensajem Paskua ba Timor Oan Iha Irlanda no Inglaterra





Ba Maluk Timor oan sira iha Irlanda no Inglaterra:

Molok atu halo festa boot Páskua tinan 2011, há’u hato’o hau nia kumprimentos no “Votos de Paz e bem!”. Ba imi tomak hau nia kumprimenus no hako’ak boot. Realidade Páskua dehan katak LIBERTASAUN. Uluk iha Egito, Israelita sira, ho Javé nia tulun, sira sai hosi rai terus no atan nian. Mosu Libertador no profeta ida naran Moisés nebé Maromak hili atu hasai povu hosi Egito no lori ba ba rai Kanaan. Ho akontesimento ida ne’e, Povo Israel komemora Paskua otas ba otas.

Iha Testamentu Foun, Na’in Jezus mos sai Moisés foun nebé mai hasai Humanidade tomak hosi salan na mate nia ukun. Nia mos liberta ita, ema salan na’in. Tan ne’e mak ita selebra Pascoa kristaun.

Ho festa Paskua nian, hodi hanoin hikas Nian Jezus nia terus, nia mate no moris hi’ias!

Iha tinan 1641, wainhira Reinos Timor hosi “Província dos Bellos” hetan ataques hosi funun nain sira hosi ema islam no ema holandês sira, sira terus, no ema nebe sarani atu mohu deit. Maibé kalan ida, mosu Kruz boot ida iha Rai Timor nia leten, hodi leno Timor tomak. Iha kalan ne’e, Kruz ne’e mosu, nia ain iha Tasi mane, nia ulun iha Tasi mane, nia liman karuk ba Loro sae, nia liman karuk ba Loro monu. Tuir Amo lulik Dominikanos sira nebe haree fenómeno ida ne’e, sira haktuir katak ne’e, sinal boot ida nebé Maromak hatudu katak, Nai Maromak fo mahon ba Rai Timor no Timor oan sira. Tan nee, mak Ilha Timor, ema bolu iha tempo nebá “Terra de Santa Cruz”.

Ohin loron, Nasaun Timor Leste hetan ona liberdade: bele ukun rasik-aan. Maibé ita sei hetan kruz wain basuk: krus no terus hosi sala: odi malu; oho malu; kan ba osan; korupsaun boot; halo obras la metin, hanesan soe osan deit; osan tokon ba tokon nabén no lakon hela deit. Ita bele dehan: libertasuan lolós seiduak kuda metin no abut klean iha Rai Timor-Leste. Tan nee´, mak Foin sa’e Timor nian, mane no feto, hakur tasi ba rai seluk atu buka serbisu no matenek. Ida ne’e mos kruz ida nebé imi tem ke lori. Nain Jezus nebé moris ona, tulun imi, fó kbiit ba imi, haraik dame ba imi, atu imi tomak hetan isi diak, no felicidade ba imi nia Família. Ita reza ba malu nafatin atu ita tomak bele sai ema foun, ema nebé moris fali ona ba moris foun, esperansa foun, entuziasmo foun!

Hako’ak boot ba imi hotu,


Porto, 23 de Abril de 2011.

Imi atan, Amo Bispo Carlos Filipe Ximenes Belo

domingo, 17 de abril de 2011

Programa Semana Paskoa

Tuir mai ne'e Programa nebe sei halo iha Kinta Feira Santa, Sexta Feira Santa, Sabadu Aleluia no Domingo Resureisaun iha Igreja St. Peter and All Souls.

Kinta feira Santa (21/04):
7.30pm: Mass of Lord's Supper "Watching" in the Parrish Centre until Midnight. Alias Fase apostolu sira nia ain. 11.45pm: Night Prayer. Alias adorasaun.

Sexta Feira Santa (22/4):
12 noon: Children's Liturgy for Good Friday. Se mak iha labarik sira lori ba. 3pm: Celebration of the Lords Passion. 7pm: Stations of the Cross for the Parish. Alias Via Sakra.

Sabadu Aleluia (23/4):
11.30am: Children's Morning Prayer and Decoration the Easter Garden. Se mak iha labarik kiik lori ba. 8.30pm: Easter Vigil, First Mass of the Resurrection.

Domingo Resureisaun (24/4):
Komesa tuku 8.30am, 9.15am, 10.45am i 6pm sei iha Mass of the Resurrection.

Ba imi hotu nia atensaun, hato'o obrigadu barak. I, PASKOA DIAK BA IMI HOTU.

Celso Oliveira

quinta-feira, 14 de abril de 2011

Estatuto Sirkula Iha Komunidadi Timor Oan


Assosiasaun Timor Oan iha Peterborough sirkula ona Estatuto iha komunidadi nia le'et iha loron 14 fulan ida ne'e.


Estatuto iha artigu 15 nebe esplika konaba naran ba assosiasaun, motto, misaun, visaun, objektivus, oinsa sai membrus, estruktura, kodigu de konduta, seluk-seluk tan.


Uma kain ida-ida sei simu fotokopia estatuto nian nebe membrus komunidadi rasik maka fahe. Depois sei konvoka fila fali reuniaun jeral hodi rona sujestaun no kritika konaba estaturo nebe refere.


Motto assosiasaun nian maka: "Integrasaun, Edukasaun, kapasita-an – dalan ba oin".

Dalan atu troka ideias iha komunidadi nia le'et konaba estatuto rasik bele halo hosi e-maill, blog komunidadi nian (http://www.easttimoreseinpeterborough.blogspot.com/) no facebook.


Celso Oliveira

terça-feira, 12 de abril de 2011

Timor Oan Halo Via Sakra no Retiro Iha Igreja Peterborough

Komunidadi Timor oan iha Peterborough halo via sakra no retiru iha Igreja St. Peter and All Souls, iha loron domingo, 10/4 liu ba.


Reza estasaun 14 ho lian Tetum hosi Ana Rosa no Cristovao da Costa iha altar nia oin, akompanya ho knananuk entrada "Jerusalem" no knananuk final "Hosana Kristu Manan". Kaer lilin no krus hodi lao iha estasaun ida-ida maka Egidio, Luis no Mario Pereira.


Iha tuku 7 kalan, padre Tony Philpot, ema Ingles maibe koalia lian Portuguez fo'o retiro ba grupu Timor oan. Taka retiru ne'e ho konfessa hodi prepara-an atu tama ba loron paskoa.


Celso Oliveira

terça-feira, 5 de abril de 2011

Komunidadi Timoroan Prepara Via Sakra no Retiru

Paskoa hanesan loron tradisaun iha Igreja Katolika. Iha tinan ida ne'e, Paskoa sei monu iha loron 24 fulan Abril.

Komunidadi Timoroan iha Peterborough sei tuir Via Sakra iha Igreja St. Peter and All Souls, iha loron 10/4, domingo, tuku 4 lokoraik.

Via Sakra ne'e hanesan primeira vez ba komunidadi Timoroan atu halo iha Igreja St. Peter and All Souls, Peterborough.

Hotu tiha Via Sakra, iha tuku 7 lokoraik, sei prepara fali retiru no konfesa hamutuk ho Padre Tony.