quinta-feira, 23 de setembro de 2010

Timoroan iha Peterborough hasoru malun ho bispo Luis hosi Brazil

Foto hamutuk ho bispo Luis

Bispo Luis ho Padre Tony selebra hamutuk missa


Bispo Luis Flavio Cappio, hosi Bahia, Brazil, selebra missa ba komunidadi portugueza iha Igreja The All Souls, Peterborough, iha loron 19 fulan ida ne'e. Timoroan lubun ida maka tuir missa nebe akompanya hosi padre Tony Philpot, ema Ingles maibe koalia mos portuguez.

Missa hotu tiha Timoroan sira entrega tais ida hanesan rekordasaun hodi hato'o kumprimentus hosi sarani Timor ba Bispo Luis nebe visita nia familia sira iha sidadi Peterborough, England.

Celso Oliveira


segunda-feira, 13 de setembro de 2010

Relatoriu/informasaun Konaba “EAST TIMOR ASSOCIATION OF PETERBOROUGH” meeting

Iha reuniaun nebe “EAST TIMOR ASSOCIATION OF PETERBOROUGH” halo iha loron 12 fulan Setembru, iha Igreja St. Peter & All Souls, tuku 7-9pm, ami koalia konaba:

- Saida maka komunidadi.

- Membru iha komunidadi nia laran.

- Oinsa komunidadi bele servisu hamutuk.

- Oinsa “EAST TIMOR ASSOCIATION OF PETERBOROUGH” bele lao ba oin.

- Preparasaun ba festa loron independensia 20 de Maio 2011.

- Ikus mai, ami koalia konaba isu ou problema nebe sirkula ou mosu iha komunidadi nia le’et.

Konaba saida maka komunidadi, Salvador (Asala) halo explikasaun 1 badak maibe nakonu ho informasaun nebe diak tebes.

Asala dehan “komunidadi halibur hamutuk hodi fo’o motivasaun nebe diak (konstrutivu) no fo’o influensia nebe diak. Hanesan Timoroan, ita halibur hamutuk hanesan individu hafoin forma grupu kiik ida hodi defende Timor nia identidadi. Ne’e duni moris hamutuk iha komunidadi ida nia laran importanti tebes iha Timoroan nia moris”.

Konaba membru nebe atu representa komunidadi, ami desidi katak membru nebe hili tiha ona, kontinua servisu hamutuk nafatin hodi lori “EAST TIMOR ASSOCIATION OF PETERBOROUGH” ba oin. Membru nebe hili ona laos permanenti/tetap. Kuandu Konstituisaun/Estatuto hosi “EAST TIMOR ASSOCIATION OF PETERBOROUGH” iha ona maka sei hili membru nebe permanenti/tetap. Ne’e duni husu atu ema hotu-hotu fo’o ideia diak hodi halo konstituisaun i dezenvolve “EAST TIMOR ASSOCIATION OF PETERBOROUGH”. Ami sei servisu hamutuk ho autoridadi lokal hodi kontinua fo’o suporte/apoio ba “EAST TIMOR ASSOCIATION OF PETERBOROUGH” .

Koalia konaba festa 20 de Maio 2011, ami desidi ona atu halo duni iha loron independensia tinan 2011. “EAST TIMOR ASSOCIATION OF PETERBOROUGH” simu surat hosi autoridadi lokal konaba selebrasaun festa independensia Timor nian. Konaba ida ne'e, ita sei halibur hamutuk filafali hodi halo preparasaun 1 diak.

Ikus liu ami koalia konaba isu ou problema nebe mosu iha komunidadi nia le’et. Ami desidi atu problema ema ida-idak nian labele lori ba grupu ou labele afekta moris komunidadi nian. Membru hosi “EAST TIMOR ASSOCIATION OF PETERBOROUGH” sei halo kontaktu ho ema sira nebe iha problema.

Ami fo’o obrigadu barak ba maluk Timoroan nebe tuir meeting ida ne’e i kontribui ho ideia nebe diak. Ba maluk sira nebe la tuir meeting, ami husu atu halo parti iha “next meeting”. “EAST TIMOR ASSOCIATION OF PETERBOROUGH” ita hotu nian.

“EAST TIMOR ASSOCIATION OF PETERBOROUGH” la aseita kualker hahalok violensia nebe estraga komunidadi nia moris.


Celso Oliveira