Resumo Atividades Half-Term 2013

Resume atividades nebe Komunidadi Timor iha Peterborough halo duranti fulan lima nia laran (Janeiro- Julho 2013). Duranti fulan Agosto holiday. Komesa fulan Setembro BBQ hamutuk (ohin, 7/9/13) hodi bele hare'e programa ba futuro nian. 

1. Desde Janeiro komesa programa reuniaun mensal hodi update ou atualiza informasaun iha komunidadi nia le'et. Duranti reuniaun, konvidados hosi liur (Mr. Jawaid no Mrs. Maria Gilbert) partisipa ona hodi fahe informasaun ba komunidadi konaba problema uma, bill, eskola, etc.

2. Komemora loron independensia nasional 20 de Maio de 2013 hetan ona partisipasaun maka'as hosi jovens sira.

3. Timor FC partisipa ona iha turnamento tebebola Refugee Week, Junho de 2013. I, iha fulan Julho 2013, ekipa tebebola 2 (Timor FC no Leste FC) partisipa iha Lucozade Powerleague.

4. Partisipa ona iha workshop konaba Social Enterprise.

5. Konvida ona padre Timoroan Pe. Acacio Castro hodi selebra misa iha 21 de Julho de 2013. Komunidadi Timor partisipa mos iha miss Sto. Antonio nebe organiza hosi komunidadi Daman. I, duranti fulan Maio reza tersu hamutuk iha Igreja. Ajuda mos fahe informasaun ba inan-aman sira hodi tau naran sira nia oan ba primeiro comunhao, batizado, etc.

Atividades sira ne'e hotu halo laiha profit ba membrus komunidadi sira. Problemas balun resolvido, balun sei pending.

Obrigado ba atensaun

Pe. Acacio Selebra Misa Ba Timoroan Iha Peterborough

Pe. Acacio Castro nebe estuda iha Roma-Italia, halo vizita loron ida deit iha sidadi Peterborough i halo misa iha Domingo, 21 de Julho, tuku 7 kalan iha Igreja St. Peter and All Souls, Peterborough ba Timoroan sira. Misa hotu kontinua ho han-hemu oferese hosi Komunidadi Timor iha Peterborough.

Dalarua ona mak padre Timoroan nebe estuda iha Roma halo vizita iha sidadi Peterborough. Primeiru mak Padre Noe Martins, segundu Padre Acacio.

Komunidadi Timor iha Peterborough kontinua servisu hamutuk ho parokia St. Peter and All Souls hodi hametin fe ba Timoroan iha sidadi Peterborough.

Celso

Komunidadi Timor Halo Via Sakra Iha Tempu Paskoa

Dia 24 de Fevereiru 2013, Domingo, tuku 4 lokoraik, Komunidadi Timor iha Peterborough mak sei halo Via Sakra hamutuk ho sarani sira seluk iha iha Igreja St. Peter and All Souls. Ne'e duni, husu ba maluk Timoroan hotu iha sidadi Peterborough atu partisipa iha Via Sakra/Jalan Salib ne'e.

Via Sakra ne'e sei halo ho lian Tetum.

Padre Noel Martins Selebra Missa Tetum Iha Peterborough

Padre Noel Martins, estuda espiritualidadi iha Roma. selebra misa ba Komunidadi Timor oan iha sidadi Peterborough, England, iha loron Domingo, 30 de Dezembro de 2012.

Padre Noel nebe halo vizita familiar iha Peterborough duranti homilia aproveita okaziaun ne'e koalia konaba Unidadi no Identidadi Timor nian. 

"Timor oan lao rai labele lakon unidadi no identidadi Timor nian", dehan padre Noel iha ninia homilia.

Missa ida ne'e hanesan momentu historiku ba padre Noel no mos ba Komunidadi Timor oan iha Peterborough tamba hafoin tiha ordena iha Portugal iha fulan Julho 2011, foin dada ida ne'e padre Noel selebra misa ho lian Tetum ba Timor oan sira. I, sarani barak mak tuir selebrasaun ne'e tamba foin dala ida Padre Timor oan halo misa ho lian Tetum iha Igreja St. Peter and All Soul's, Peterborough.

Komunidadi Timor iha Peterborough servisu hamutuk ho Igreja hodi fo'o tulun moral ba Timor oan iha sidadi Peterborough. 

Oras ne'e, Timor oan barak mak hela no servisu iha Inglaterra.

Texto: Celso Oliveira

Fotografias: Mito

The Christmas Lights Switch On in Peterborough

At 6pm on 17th November 2012

All pictures taken by: Celso Oliveira

12 de Novembro 2012 Selebra Iha Peterborough

 Manuel Soriano, DJ Timoroan

 Membru Komunidadi

Timoroan iha Peterborough

Komunidadi Timor iha Peterborough organiza halibur hamutuk Timoroan iha Peterborough hodi hanoin hikas tinan 21 Masakre Santa Cruz, iha loron Domingo, 11 de Novembro 2012, iha Beehive Community Centre, Peterborough.

Duranti halibur hamutuk, komunidadi hare'e fila fali film masakre Santa Cruz, halo refleksaun konaba prezensa iha Peterborough, han-hemu no ikus liu dansa.

Manuel Soriano alias Amanu DJ Timoroan iha Peterborough anima komemorasaun masakre Santa Cruz.

Iha 12 de Novembro de 1991, klosan Timor halo manifestasaun pasifika hosi Igreja Motael to semiteriu Santa Cruz nebe ikus mai militar Indonesia tiru mate kuaze 300 no barak sei lakon to'o ohin loron. 12 de Novembro hanesan loron Juventude Timor.

Komunidadi Timor Iha Peterborough Selebra 12 de Novembro de 2012

Komunidadi Timor iha Peterborough sei halibur hamutuk iha salaun Beehive Community hodi selebra loron Juventude Timor nian ou tinan 21 masakre Santa Cruz. Halibur malun sei halo iha loron Domingo, 11/11, komesa tuku 5.

Iha halibur malun ne'e, sei hatudu filmajem masakre de Santa Cruz, 12/11/91 hosi Timoroan Mito, sei rona muzik hosi tokador Timor: Nico Santos, Bernardino, Alfredo no Manuel Soriano (DJ Pioner).

Sei taka ho Han "snack/makanan ringan" no hemu " non-alkoholiku" nebe kontribui voluntariamente hosi komunidadi rasik.

Masakre Santa Cruz konhesidu iha mundu tomak, bainhira jornalista britaniku Max Stall Konsege halo filmajem hodi hatudu ba mundu tomak demonstrasaun Pacifica nebe Timoroan halo iha 12 de Novembro de 1991, hosi Igreja Motael to'o semiteriu Santa Cruz nebe halo mate 400 no lakon barak.