sábado, 23 de abril de 2011

Bispo Belo Haruka Mensajem Paskua ba Timor Oan Iha Irlanda no Inglaterra





Ba Maluk Timor oan sira iha Irlanda no Inglaterra:

Molok atu halo festa boot Páskua tinan 2011, há’u hato’o hau nia kumprimentos no “Votos de Paz e bem!”. Ba imi tomak hau nia kumprimenus no hako’ak boot. Realidade Páskua dehan katak LIBERTASAUN. Uluk iha Egito, Israelita sira, ho Javé nia tulun, sira sai hosi rai terus no atan nian. Mosu Libertador no profeta ida naran Moisés nebé Maromak hili atu hasai povu hosi Egito no lori ba ba rai Kanaan. Ho akontesimento ida ne’e, Povo Israel komemora Paskua otas ba otas.

Iha Testamentu Foun, Na’in Jezus mos sai Moisés foun nebé mai hasai Humanidade tomak hosi salan na mate nia ukun. Nia mos liberta ita, ema salan na’in. Tan ne’e mak ita selebra Pascoa kristaun.

Ho festa Paskua nian, hodi hanoin hikas Nian Jezus nia terus, nia mate no moris hi’ias!

Iha tinan 1641, wainhira Reinos Timor hosi “Província dos Bellos” hetan ataques hosi funun nain sira hosi ema islam no ema holandês sira, sira terus, no ema nebe sarani atu mohu deit. Maibé kalan ida, mosu Kruz boot ida iha Rai Timor nia leten, hodi leno Timor tomak. Iha kalan ne’e, Kruz ne’e mosu, nia ain iha Tasi mane, nia ulun iha Tasi mane, nia liman karuk ba Loro sae, nia liman karuk ba Loro monu. Tuir Amo lulik Dominikanos sira nebe haree fenómeno ida ne’e, sira haktuir katak ne’e, sinal boot ida nebé Maromak hatudu katak, Nai Maromak fo mahon ba Rai Timor no Timor oan sira. Tan nee, mak Ilha Timor, ema bolu iha tempo nebá “Terra de Santa Cruz”.

Ohin loron, Nasaun Timor Leste hetan ona liberdade: bele ukun rasik-aan. Maibé ita sei hetan kruz wain basuk: krus no terus hosi sala: odi malu; oho malu; kan ba osan; korupsaun boot; halo obras la metin, hanesan soe osan deit; osan tokon ba tokon nabén no lakon hela deit. Ita bele dehan: libertasuan lolós seiduak kuda metin no abut klean iha Rai Timor-Leste. Tan nee´, mak Foin sa’e Timor nian, mane no feto, hakur tasi ba rai seluk atu buka serbisu no matenek. Ida ne’e mos kruz ida nebé imi tem ke lori. Nain Jezus nebé moris ona, tulun imi, fó kbiit ba imi, haraik dame ba imi, atu imi tomak hetan isi diak, no felicidade ba imi nia Família. Ita reza ba malu nafatin atu ita tomak bele sai ema foun, ema nebé moris fali ona ba moris foun, esperansa foun, entuziasmo foun!

Hako’ak boot ba imi hotu,


Porto, 23 de Abril de 2011.

Imi atan, Amo Bispo Carlos Filipe Ximenes Belo

domingo, 17 de abril de 2011

Programa Semana Paskoa

Tuir mai ne'e Programa nebe sei halo iha Kinta Feira Santa, Sexta Feira Santa, Sabadu Aleluia no Domingo Resureisaun iha Igreja St. Peter and All Souls.

Kinta feira Santa (21/04):
7.30pm: Mass of Lord's Supper "Watching" in the Parrish Centre until Midnight. Alias Fase apostolu sira nia ain. 11.45pm: Night Prayer. Alias adorasaun.

Sexta Feira Santa (22/4):
12 noon: Children's Liturgy for Good Friday. Se mak iha labarik sira lori ba. 3pm: Celebration of the Lords Passion. 7pm: Stations of the Cross for the Parish. Alias Via Sakra.

Sabadu Aleluia (23/4):
11.30am: Children's Morning Prayer and Decoration the Easter Garden. Se mak iha labarik kiik lori ba. 8.30pm: Easter Vigil, First Mass of the Resurrection.

Domingo Resureisaun (24/4):
Komesa tuku 8.30am, 9.15am, 10.45am i 6pm sei iha Mass of the Resurrection.

Ba imi hotu nia atensaun, hato'o obrigadu barak. I, PASKOA DIAK BA IMI HOTU.

Celso Oliveira

quinta-feira, 14 de abril de 2011

Estatuto Sirkula Iha Komunidadi Timor Oan


Assosiasaun Timor Oan iha Peterborough sirkula ona Estatuto iha komunidadi nia le'et iha loron 14 fulan ida ne'e.


Estatuto iha artigu 15 nebe esplika konaba naran ba assosiasaun, motto, misaun, visaun, objektivus, oinsa sai membrus, estruktura, kodigu de konduta, seluk-seluk tan.


Uma kain ida-ida sei simu fotokopia estatuto nian nebe membrus komunidadi rasik maka fahe. Depois sei konvoka fila fali reuniaun jeral hodi rona sujestaun no kritika konaba estaturo nebe refere.


Motto assosiasaun nian maka: "Integrasaun, Edukasaun, kapasita-an – dalan ba oin".

Dalan atu troka ideias iha komunidadi nia le'et konaba estatuto rasik bele halo hosi e-maill, blog komunidadi nian (http://www.easttimoreseinpeterborough.blogspot.com/) no facebook.


Celso Oliveira

terça-feira, 12 de abril de 2011

Timor Oan Halo Via Sakra no Retiro Iha Igreja Peterborough

Komunidadi Timor oan iha Peterborough halo via sakra no retiru iha Igreja St. Peter and All Souls, iha loron domingo, 10/4 liu ba.


Reza estasaun 14 ho lian Tetum hosi Ana Rosa no Cristovao da Costa iha altar nia oin, akompanya ho knananuk entrada "Jerusalem" no knananuk final "Hosana Kristu Manan". Kaer lilin no krus hodi lao iha estasaun ida-ida maka Egidio, Luis no Mario Pereira.


Iha tuku 7 kalan, padre Tony Philpot, ema Ingles maibe koalia lian Portuguez fo'o retiro ba grupu Timor oan. Taka retiru ne'e ho konfessa hodi prepara-an atu tama ba loron paskoa.


Celso Oliveira

terça-feira, 5 de abril de 2011

Komunidadi Timoroan Prepara Via Sakra no Retiru

Paskoa hanesan loron tradisaun iha Igreja Katolika. Iha tinan ida ne'e, Paskoa sei monu iha loron 24 fulan Abril.

Komunidadi Timoroan iha Peterborough sei tuir Via Sakra iha Igreja St. Peter and All Souls, iha loron 10/4, domingo, tuku 4 lokoraik.

Via Sakra ne'e hanesan primeira vez ba komunidadi Timoroan atu halo iha Igreja St. Peter and All Souls, Peterborough.

Hotu tiha Via Sakra, iha tuku 7 lokoraik, sei prepara fali retiru no konfesa hamutuk ho Padre Tony.

quarta-feira, 9 de março de 2011

Lokoraik Ida Ho PM Xanana Gusmao Iha Hotel Millennium, London Mayfair


Tinan sia tiha Timor Leste proklama Independensia, iha 20 de Maio de 2002, hau foin dala rua hasoru lider kharismatika i aktual PM Timor Leste Kayrala Xanana Gusmao. Primeiru enkontru akontese iha Hotel Tivoli, Lisboa, tinan 2003. Segundu enkontru foin daudaun iha Hotel Millennium, London Mayfair, dia 7 de Marsu lokoraik, durante delegasaun Timor Leste nebe dirigida rasik hosi PM Xanana Gusmao halo visita ofisial iha Inglaterra, loron 6-8 de Marsu tinan ida ne’e.

Hau kontinua iha konsiderasaun ba PM Xanana hanesan ema ida nebe iha super-potensi atu lori povo Timor sai hosi sofrimentu, sai hosi kiak iha tempu Pos-Guerra. Laos fasil, klaru.

PM Xanana Gusmao kontinua hatudu ninia-an nudar lider karismatik, hatudu ninia domin ba labarik sira, hatudu espiritu atu servi i sakrifika hodi hadia povo Timor nia moris. Iha tempu funu Xanana Gusmao hatudu tiha ona ninia kapasidadi hodi liberta povo. Ohin loron, PM Xanana kontinua dedika ninia tempu no hanoin atu lori povo Timor sai hosi kiak. Dala ida tan, klaru laos fasil.

Iha hasoru malun dia 7 de Marsu 2011, hau ba ho kualidadi hanesan membru hosi Assosiasaun Timor oan iha Peterborough hodi ami fo’o hanoin ba malun konaba oinsa Timor oan sira iha Inglaterra no Irlanda organiza-an iha organizasaun nia laran. Ami mos koalia konaba atu loke agensia konsuladu Timor nian tamba orsamentu 2011 aprovadu ona, ne’e duni tinan ne’e tenki loke ona konsuladu Timor Leste iha Manchester, Inglaterra.

Hau rasik la konkorda ho ideia atu loke agensia konsuladu Timor Leste iha Manchester tamba tuir dadus nebe iha hatudu katak Timor oan barak liu maka hela iha sidadi Bristol i Oxford. Laos Manchester. Tuir lolos loke agensia konsuladu iha Londres.

Assosiasaun Timor oan iha Peterborough nebe bolu “East Timorese Association of Peterborouugh”, hamrik iha tinan kotuk, 2010, ho suporte hosi Igreja St. Peter & All Souls. Membrus nebe oras ne’e iha laos permanenti tamba oras ne’e daudaun ami sei elabora Estatuto ba Assosiasaun. Kuandu Estatuto pronto ona sei halo eleisaun hodi hili ema nebe iha kapasidadi i responsabilidadi hodi organiza komunidadi Timor oan iha Peterborough.

Se Timor oan hotu-hotu iha Inglaterra no Irlanda organiza-an halo didiak iha organizasaun nia laran, entaun bele hetan suksesu barak liu tan.

Celso Oliveira

quarta-feira, 23 de fevereiro de 2011

"East Timorese Association of Peterborough" iha 2010

Madre Mary, Pe. David no Pe. Jhon ho salendang Timor Leste


Iha Tinan 2010…
- 27/02/10, ho apoio hosi Igreja St. Peter & All Souls hamrik Assosiasaun Timor oan iha Peterborough naran: "East Timorese Association of Peterborough". Membru nain 5: Celso, Estanislau, Zito, Ana i Cirtovao.
- 13/03/10, komunidadi halibur hamutuk iha Igreja St. Peter & All Souls koalia konaba oinsa atu halao "East Timorese Association of Peterborough". Membru nain 2 tama: Salvador i Clara
- 14/05/10, membru assosiasaun nain 3 (Celso, Salvador no Zito) hasoru malun ho New Link koalia konaba Konstituisaun ba East Timorese Association of Peterborough.
- 12/09/10, komunidadi halibur hamutuk iha Igreja St. Peter & All Souls koalia konaba: saida maka komunidadi no oinsa sai membru iha komunidadi.
- 04/12/10, membru komunidadi halibur hamutuk ho Polisia iha Igreja St. Peter & All Souls, koalia konaba EDL (English Defende League) nebe halo manifestasaun iha 11/12 iha Peterborough.
- Iha loron 12 fulan Dezembro tinan 2010, komunidadi hotu-hotu iha Peterborough hamutuk iha “ONE VOICE, ONE COMMUNITY” halo deklarasaun hodi kria paz no harmonia iha Peterborough. Komunidadi Timor Leste mos halo parti.
- 19/12/10 familia Timor tuir retiru molok Natal hamutuk ho padre Tony, iha Igreja St. Peter & All Souls nia salaun. Hodi tema: “Formar Parte Numa Minoria”. Hamutuk Timor oan 17 representa família Timor oan iha Peterborough maka tuir retiro ida ne’e.


Celso Oliveira