quinta-feira, 26 de abril de 2012

Historia Badak Ida Konaba Timor FC in Peterborough




Hamutuk ho Dean Watson, Officer Football iha Peterboroug

 Friendship Polish vs Timor FC, 2010

 Manan tasa "Best Team" iha Refugee Week 2011

 Partisipa iha Jogo Anti Racism "One Game, One Community", Northampton, Out 2011
 Membro official Timor FC halo rejisto hodi partisipa iha Peterborough International League. 
Foto hamutuk ho Dean Watson, Officer Footboll Peterborough no Gabriel Zukaine, Defesa Peterborough United
Timor FC hanesan Runner-Up iha Peterborough International League, 7side, 2011/2012


Iha sidadi Peterborough, Inglaterra, oras ne’e daudaun moris Timor oan barak, entre 300-400. Maioria moris nudar trabalhador. Balun servisu dader, balun lokoraik no balun kalan.

Nudar trabalhador lao rai, Timor oan sira ne’e okupa sira nia tempu barak liu iha servisu fatin (fabrika ai-fuan, fabrika hahan, etc...). Ba sira, uma hanesan fatin atu deskansa/toba deit. Tempu barak liu sira uza iha servisu fatin.

Maibe, iha sidadi ne’e ezisti grupo desportivo “futebol” nebe bolu naran Timor FC in Peterborough.

Historia tebe bola Timor oan nian iha sidadi Peterborough laos foin mak komesa. Maibe, desde 2002, kuandu Timor oan sira komesa tama iha sidadi Peterborough, sira sempre bolu malun (liu-liu iha tempu rai manas ou tempu folga) hodi ba tebe bola ou hasai kosar iha kampu futebol Gladstone.

Maibe, ofisialmente, grupo Timor FC iha Peterborough foin komesa tuir kompetisaun iha sidadi Peterborough iha tinan 2011. Ida ne’e akontese tamba hafoin iha 2009 komesa mosu fali grupo oan ida kompostu hosi jogadores nasionais balun hosi Baucau, Dili, no distritu seluk tan nebe dinamiku i ativu.

Iha 2010 Timor FC halo kontatu ho Sr. Dean Watson, ofisial futebol iha Peterborough hodi fo konsehimentu Timor FC ninia existensia ba nia. Mr. Dean hatudu ninia apoio i husu atu Timor FC in peterborough partisipa iha eventu desportivu iha sidadi Peterborough. Mr. Dean dehan “desportu importanti ba lao rai sira hodi bele halakon stress, hodi mantein ekilibru iha isin no klamar”.

Iha Junho 2011, primeira vez Timor FC in Peterborough partisipa iha turnamentu hodi selebra loron refujiadu iha sidadi Peterborough. Iha turnamentu ne’e, Timor FC, hetan tasa “Best Team” iha kompetisaun futebol “refugee week 2011”. Iha fulan Outubro 2011, Mr. Dean husu jogadores nain tolu hosi Timor FC hodi partisipa iha jogo anti rasismu “One Game, One Community” nebe halo iha Northampton, no, iha Peterborough International League, 7side, tinan 2011/2012, Timor FC hetan “Runner-up”.

Oras ne’e, Timor FC iha Peterborough ninia treinador maka Demetrio da Silva. Membrus ofisiais Timor FC in Peterborough maka Zito Carvalho (presidente), Severino Carvalho (sekretariu) no sira seluk tan.

Ezistensia Timor FC in Peterborough mai hosi kuota ou kontribuisaun membrus ofisiais no komunidadi balun nebe hatudu sira nia interesse ba Timor FC.


Celso Oliveira,
Responsavel ba Media iha Timor FC in Peterborough